Ministériu Petróleu no Rekursus Minerais kontinua sosializa implementasaun projetu Tasi-Mane ba komunidade iha Natarbora, Munisípiu Manatutu hanesan área ne’ebé sei hari’i planta Gás Naturál Liquifeitu – GNL, indústia refinaria no instalasaun petrokímika.
Sua Eselénsia Ministru Petróleu no Rekursus Minerais, Francisco da Costa Monteiro defende katak, dezenvolvimentu Kosta Súl determinante teb-tebes, hodi assegura Timor-Leste nia riku-soin liu-husi investimentu interna ho kriasaun dezenvolvimentu integradu iha Natarbora, hodi estimula ekonomia nasionál.
Ba kombinasaun indústria refinaria no instalasaun petrokímika, presiza terrenu hektare liu rihun no rai-na’in promete ona ba Sua Eselénsia Primeiru Ministru Xanana Gusmão katak, prosesu libertasaun rai ba kriasaun plantas no fábrika la komplikadu, tanba la iha rezidénsia komunidade ba espasu futura instalasaun indústria ne’e.
Atu garante implementasaun projetu iha Natarbora, Ministériu Petróleu no Rekursus Minerais no instituisaun tutela sira, nafatin halo negosiasaun paralela ho Austrália no Kompaña Joint Venture, hodi akomoda sira nia interesse, hodi bele dada kadoras no Planta GNL mai Timor-Leste no hari’i indústria refinaria no petrokímika iha Timor-Leste.
Governu husu nafatin koolaborasaun mútua husi komunidade, hodi garante implementasaun projetu estratéjiku ne’e, hodi konkretiza planu governu hodi kria sentru dezenvolvimentu integradu seitór petróleo ih arai-laran no TIMOR GAP E.P., sei kontinua sosializa ba komunidade, impaktu pozitivu no negativu, inklui benefisiu no kustu husi projektu ne’e rasik.
Durante sosializasaun, komunidade sira husu esplikasaun kona-ba impaktu diretu husi indústria petrolífera no Sua Eslénsia Ministru Monteiro tenik katak, projetu nasionál ne’e imidietamente sei fo impaktu ba komunidade Natarbora, tanba movimentu iha indústria ne’e sei rekere kriasaun hotelaria, pekuária, hortikultura, kriasaun empregu no efeitu ne’e sei alarga to’o munisípiu seluk.
